JUHUDI ZA KUTIBU UKIMWI ZAANZA KUZAA MATUNDA

Imerekebishwa na kuchapishwa kutoka BBC SWAHILI leo tarehe 09/07/2013

Wagonjwa wawili wameondolewa bughdha ya kutumia madawa ya kupunguza makali ya ukimwi maishani mwao baada ya kufanyiwa upasuaji na kupandikiziwa uboho wan binadamu au (Bone marrow), hatua inayosemekana kuondoa virusi vya HIV mwilini mwao.

Wagonjwa hao ambao hawajatajwa majina, wameishi na virusi hivyo kwa takriban miaka 30. Wote walikuwa wanaugua saratani, aina ya lymphoma, ambayo ilihitaji wafanyiwe upasuaji sehemu ya Uboho au Bone marrow (ndipo celi mpya za biadamu hutengezwa mwilini na inaaminika kuwa kitovu cha virusi vya HIV mwilini).

Baada ya kufanyiwa upasuaji huo, hapakuwa na virusi mwilini kwa miaka miwili kwa mgonjwa mmoja wakati mwingine anaishi kwa miaka minne bila ya virusi kuonekana. Wagonjwa hao sasa hawatumii tena dawa za kupunguza makali ya ukimwi. Upasuaji huu ulifanyika kwa wagonjwa hao kwa sababu walikuwa wanaugua saratani iliyohitaji matibabu.

Madaktai waliofanya utafiti huo katika hospitali ya matibabu ya wanawake ya Brigham nchini Marekani, wanasema ni mapema mno kuzungumzia uwezekano wa kutibu virusi hivyo kwani kuna unawezekano vikarejea wakati wowote, na kuongezea kuwa ni vigumu sana kutibu Ukimwi, kwa sababu virusi hujificha ndani ya DNA ya mtu na hivyo kusababisha virusi sugu ambavyo haziwezi kutibika. Madawa ya kupunguza makali ya virusi vya HIV husaidia kudhibiti virusi hivyo ndani ya damu lakini wakati mtu anapokosa kumeza dawa hizo virusi hurejea tena.

Inasemekana kwamba ni mapema mno kuona upasuaji huo kama tiba ya ukiwmi, na hata ikiwa itasemekana kuwa tiba basi sio tiba nzuri kwani ni ghali mno na kwa baadhi ya wagonjwa kuna uwezekano wa kufariki ikiwa ni kwa asilimia 15 hadi 20% kwa miaka ya kwanza baada ya kufanyiwa upasuaji.