NGAMIA WASHUKIWA KUBEBA VIRUSI VYA HOMA YA MAFUA MAKALI (MERS CORONAVIRUS)

Taarifa ya awali ya utafiti wa kubaini chanzo cha mlipuko wa homa ya mafua makali (MERS) ulizozikumba nchi za mataifa ya mashariki ya kati ikiwemo Saudi Arabia imeonyesha kwamba wanyama aina ya Ngamia wanashukiwa kuwa ndio chanzo cha virusi (Coronavirus) vinavyosababisha homa hiyo.

Utafiti huo ulifanywa kwa kuchukua sampuli za damu za wanyama wanaofugwa (livestock animals) ikiwemo Ngamia, kondoo, Mbuzi na Ng’ombe, kutoka mataifa mbalimbali. Sampuli hizo zilipimwa kama zina kinga ya mwili inayopambana na virusi hivyo (antibodies) ili kujua kama wanyama hao waliwali waliwahi kutengeneza kinga ya  mwili baada ya kuathiriwa na Kirusi hicho kipindi cha nyuma kabla ya virusi hivyo kusambaa kwa binadamu.

Baada ya vipimo hivyo matokeo yalionyesha kwamba ngamia 15 kati ya 105 kutoka Visiwa vya Canari (Canary Islands) walikuwa na kiasi kidogo cha kinga ya mwili inayopambana na virusi vya Coronavirus, huku Ngamia wote 50 kutoka Oman wakionyesha kubeba kinga ya mwili ya kupambana na virusi kwa kikubwa hali inayoonyesha kuwa kuna maambukizi yanayoendelea kutokea baina ya ngamia na kumuathiri binadamu.

Pamoja na matokeo hayo kuonyesha kwamba ngamia wote kutoka Oman waliwahi kuambukizwa virus vya Coronavirus lakini hakuna kesi yoyote ya homa ya mafua makali iliyowahi kuripotiwa kutokea kwenye nchi hiyo hali inayoashiria kwamba huenda maambukizi hayo ni mampya na huenda nchi hiyo ikakumbwa na mlipuko wa homa hiyo hatari ya mafua makali muda mfupi ujao.

Homa ya mafua makali (MERS) iliripotiwa na Shirika la Afya Duniani (WHO) kutokea kwa mara ya kwanza katika nchi ya Saudi Arabia mwaka mmoja uliopita, mpaka sasa idadi ya watu walioripotiwa kuambukizwa Virusi vya mafua makali imefikia 94 huku watu 46 kati ya hao wameripotiwa kupoteza maisha yao.

Kusoma zaidi BOFYA HAPA