UTAPIAMLO NI CHANZO CHA TAIFA LA WATU WAJINGA NA MASIKINI

Utapiamlo kwa watoto ni Moja ya Matatizo makubwa yanayoikabili Dunia kwa sasa, tatizo hili limezikumba nchi nyingi sana Duniani hasa nchi zilizo kusini mwa jangwa la Sahara (ikiwemo Tanzania) na Asia ya kusini.

Utafiti wa hivi karibuni uliochapishwa katika Jarida la Tiba la Lancet (Lancet medical jornal) unaonesha kwamba utapiamlo husababisha Asilimia 45 ya vifo vyote vinavyotokea kwa watoto walio chini ya umri wa miaka mitano. Watoto wengine hudumaa kimwili na Ubongo kushindwa kufanya kazi yake kama inavyotakiwa (Moja kati ya kazi ya ubongo ni Kufikiria)

Dr. Robert Black wa chuo kikuu cha Johns Hopkins ambae alihusika katika utafiti huo alisema kwamba Utapiamlo unaweza kumkumba mtoto tangu akiwa tumboni iwapo mama mjamzito atakuwa hana lishe bora (mwenye utapiamlo) hivyo hata kama mtoto atazaliwa, uwezekano kifo, kudumaa kimwili na kiakili utakuwa ni mkubwa sana.

Utafiti huo unaonesha kwamba kuwekeza kwenye lishe bora ya watoto kutaongeza ukuaji wa  uchumi wa nchi kwa kuongezeka kwa watoto wanaofanya vizuri mashuleni na hatimae kuwa watu wenye uwezo mkubwa wa kufikiria na nguvu kazi bora kwa Taifa.

Pia imebainika kwamba mtu mzima aliewahi kuwa na utapiamlo utotoni anaingiza kipato cha asilimia 20 pungufu ya mtu Yule ambaye alikulia katika lishe bora.

Mtoto na mtu mzima mwenye utapiamlo hukumbwa na maradhi mengi kwa kuwa kinga yake dhidi ya magonjwa huwa inashuka hivyo wazazi na Taifa kwa ujumla hupoteza pesa na muda mwingi kutafuta Tiba badala ya kufanya shughuli za uzalishaji uchumi hali inayopelekea kuongezeka kwa Umasikini, hivyo ni vyema kwa wananchi na Serikali kuamka na kuanza kupalilia lishe bora za watoto tangu wakiwa tumboni ili kuhakikisha tunatengeneza Taifa la watu MAKINI.