TAHADHARI: VIRUSI VYA MAFUA YA NDEGE (H7N9) VYASADIKIWA KUSAMBAZWA NA BINADAMU

Ungonjwa wa mafua ya ndege unaosababishwa na kirusi aina ya H7N9 ambao awali ulilipotiwa kusambazwa kutoka kwa ndege mwenye ugonjwa huo kwenda kwa binadamu, sasa unasadikiwa kusambazwa kutoka kwa binadamu aliyeambukizwa kirusi hicho kwenda kwa binadamu mwingine kwa njia ya hewa.

Uwezekano huo umekuja miezi miwili tangu kuripotiwa kutokea kwa Ugonjwa huo baada ya mwanamke moja (32) nchini china kusadikiwa kuambukizwa virusi vya ndege (H7N9) kutoka kwa Baba yake mzazi, inasemekana Baba huyo (60) alienda kutembelea soko la ndege na baada ya wiki moja alipata mafua makali ambapo mtoto wake wa kike alilazimika kumbeba na kumpeleka hospitalini, walipofika hospitalini walipimwa na kugundulika kwamba wote wameambukizwa mafua ya ndege na hivyo kulazwa kwenye chumba cha wagonjwa walio chini ya uangalizi maalumu (ICU), baadae wote wawili wakafa kutokana na kufeli kwa viungo vya ndani (multiple organ failure).

Baada ya tukio hilo Wataalamu wa Afya walichukua vipimo vya watu 43 waliowahi kuwa karibu na wagonjwa wa mafua ya ndege (H7N9) lakini matokeo yalikuwa ni ‘NEGATIVE’, na hivyo kuonyesha kwamba uwezo wa kirusi hicho kusambaa kutoka kwa mtu mmoja kwenda kwa mtu mwingine ni mdogo.

Mpaka sasa hakuna uthibitisho wa kiutafiti unaoonyesha kwamba kirusi hicho (H7N9) kinaweza kujibadili na kupata uwezo wa kusambaa kutoka kwa mtu mmoja kwenda kwa mtu mwingine. Hivyo tukio lililotokea ni la kwanza kutokea na linaonesha huenda kuna uwezekano wa kusambaa (probable transmission) kwa virusi hivyo (H7N9) baina ya watu kwa njia ya hewa.

Ugonjwa wa mafua ya ndege (H7N9) uliripotiwa na Shirika la Afya duniani (WHO) kutokea nchini China tarehe 1 mwezi wa 4 mwaka huu, ukitokea kwa wanyama aina ya ndege. Tangu kutokea kwa ugonjwa huo, zaidi ya watu 130 wameripotiwa kuambukizwa virusi vya H7N9 na 40 tayari wameshapoteza maisha yao mpaka sasa.

Kusoma zaidi BOFYA HAPA